बुधवार, २० जुलै, २०११

कळली कधी मला ना ती जात पावसाची..

भलती खट्याळ होती, ती रात पावसाची
कळली कधी मला ना ती जात पावसाची

पाहून एकटी मी, तो सरसरून आला
कसली अशी निराळी रितभात पावसाची??

विद्द्युल्लता जराशी, लाजून काय आली
झाली पुन्हा फ़िरूनी सुरुवात पावसाची

त्या पावसात भिजला चातक मलाच म्हणतो
'बसुनी पुन्हा करूया, चल बात पावसाची'

घेता मिठीत त्याने, सर कोसळून गेली
अन ओल ही नव्याने, श्वासात पावसाची!

मज भोवती सयींचे, दाटून मेघ आले
आधीच हा दुरावा, भर त्यात पावसाची!

आला मध्येच दडला,रंगांमधून हसला
मेघातली गुपिते , मज ज्ञात पावसाची

धुंदी अशी नभाची, धारांत सांडलेली
घेऊ नशा भरूनी, ग्लासात पावसाची
- प्राजु

Page copy protected against web site content infringement by Copyscape