असे लाघवी तू हसावे कशाला?

असे लाघवी तू हसावे कशाला?
नि हृदयात काही हलावे कशाला?

मला ठाव असती बहाणे तुझे ते
खरे सांग लटके रूसावे कशाला?

तुझ्या पापण्यांनीच होकार दिधला
अता सांग दुसरे पुरावे कशाला?

तुझे भास मधुमास घेऊन येती
जुईली परी तू फ़ुलावे कशाला?

तुला बिलगण्याची मुभा पावसाला!!
तयाच्या सवे तू भिजावे कशाला?

तुला ठाव आहे, मला ठाव आहे
उगा औपचारीक व्हावे कशाला

असे साथ ही जन्मजन्मांतरीची
अता हे फ़ुकाचे दुरावे कशाला?

- प्राजु