सतरंगांचा भलता तोरा..

हिरव्या नवथर अंगावरती
फ़ेर धरूनी उठे शहारा
बिंदू नाजूक अवखळ ओला
भासे मज लखलखता पारा..

फ़ुंकर इवली हळूच कानी
शीळ घालूनी घुमतो वारा
उतरूनी येतो अलगद खाली
रवी किरणांचा धुंद पसारा..

मेघ गर्जूनी समीप येती
हृदयी त्यांच्या घुमे नगारा
काळीज होते पाणी पाणी
आणिक कोसळती जलधारा..

सरसावली मग रवीकिरणेही
करून हलका एक इशारा
लख्ख न्हाऊनी उन्हात ओल्या
रंग धरेचा सोनसाजरा..

कमान ऐसी उभी राहिली
रंग फ़ासूनी आज भरारा
इंद्रधनू ते मिरवीत होते
सतरंगांचा भलता तोरा..

- प्राजु