पुन्हा नव्याने..

स्मृतीपटलावर नाव कोरले ,पंचेंद्रियांनी तुझे नव्याने
महाभूतांच्या साक्षीने तुज, सर्वस्व दिले पुन्हा नव्याने

भरून येता आभाळ सारे, होते ओली चिंब नव्याने,
तुझ्या सयींच्या अमृतधारा, घेते हाती थेंब नव्याने..

तुझ्या सवे त्या अवकाशी मी, झंकारावे पुन्हा नव्याने,
प्रीत फ़ुलावी कणकणातून, साकारावे स्वप्न नव्याने..

लटके थोडे रूसावे आणि, तुझी आर्जवे पुन्हा नव्याने,
कधी पाकळ्या, कधी फ़ुले, काव्य नवे पुन्हा नव्याने..

गीत सुखाचे आळवताना, नवी सुरावट, छंद नव्याने,
हातामध्ये हात आणिक उरांत येती स्पंद नव्याने..

- प्राजु