अनंताचा खेळ..

गेला रूसुनिया | कातर सांजेला |
तेजाचा तो गोळा | लालबुंद ||

कललेली सांज | चढणारी रात |
सोडुनिया साथ | रवी गेला ||

कुशित तमाच्या | नक्षत्रे सहस्त्र |
नांदती एकत्र | चांदवर्खी ||

शशीबिंब नभी | लोभस देखणे |
धरेचे लाजणे | पाहून ते ||

चंदेरी ही रात | सावळा शृंगार |
क्षितिजाच्या पार | रवी पाही ||

वितळला राग | सोडी अहंकारा |
मागतो किनारा | नभाकडे ||

भिजली पहाट | त्याच्या आसवांत |
झाली वाटाघाट | चंद्रासवे ||

चांद परतूनी | रवीबिंब आले |
क्षितिज रंगले | केशरात ||

रोजचाच घोळ | नाही ताळमेळ |
अनंताचा खेळ | चालू राही ||

- प्राजु
वृत्त : देवद्वार छंद (ओवी वृत्त)
मात्रा : ६ + ६ + ६ +४