मिठी मारायला लाटा पहा येती किना-याला

मिठी मारायला लाटा पहा येती किना-याला
लपवते लाजुनी रेती उमटलेल्या शहा-याला

तुझे बेभान झाले मन जरासा घाल तू आवर
कुणी पोळावया घेतात का हाती निखा-याला?

कशाला काळजी पडल्या छताची आणि भिंतींची
तिथे बघ पाखरू आलेय तुळईच्या निवा-याला

तुझ्या शब्दातली जादू तुझी स्वप्ने तुझ्या गोष्टी
मला गजलेत बांधुन आवरू दे या पसा-याला

"मिठी मागायची आहे धरेची , तू निखळ ना रे!"
म्हणे हे मागणे आकाश करते रोज ता-याला

सख्या जाणून आहे गंधही हृदयातला माझ्या
'नको वाहूस कोठेही!' कुणी सांगाल वा-याला?

सरींची वाट बघण्यातच कदाचित जन्म हा जाइल
खुळ्या तू ऐक मनमोरा मिटव फुलल्या पिसा-याला

- प्राजू