म्हणे फ़ुलांचा झाला होता ऋतूंत गोंधळ !

वसंत नव्हता, नव्हता श्रावण, तरिही दरवळ??
म्हणे फ़ुलांचा झाला होता ऋतूंत गोंधळ !

कितीकितीदा आवरले मी तुला तरीही
जिभे तुझी का चालू आहे उगाच वळवळ?

दूर दूरवर जाती नजरा रोज पावसा
किती तर्‍हेने तुझी करावी सदैव अटकळ??

गोठुन गेल्या अश्रूला हा रुमाल म्हणतो
'जाऊ दे ना! किती ताणशी, आता ओघळ!'

कुणी कसेही फ़ुंकावे, आवाजच व्हावा!
नाते अपुले होते का रे इतके पोकळ?

ओढ कधी ना मला वाटली तुझी जीवना
इतकी होती तरी कशी  श्वासांची वर्दळ?

गेलास असा माझे सगळे घेउन सोबत
सख्या तुझे मी नाव ठेवले आहे वादळ

पापण्यातली स्वप्ने आता मलाच म्हणती
'प्राजू' का गं तुला वाटतो आम्ही अडगळ?

- प्राजु