जरासे..

ते बोलणे जरासे, ते ऐकणे जरासे
गप्पांत आपुल्या रात्री जागणे जरासे..

अलवार घे उशाला, तू हात आठवांचा
होऊन भास माझे, तव हासणे जरासे..

ते सूर ओळखीचे, गीतात बांधलेले
अठवून ते पुन्हा मी, मग छेडणे जरासे..

धारा तशाच आल्या, बेभान नाचणार्‍या
बांधून थेंब पायी, मी नाचणे जरासे..

अस्तित्व गुंफ़लेले, मजभोवती कुणाचे
जाणून ते पुन्हा मी, हुंकारणे जरासे..

नाजूक पापण्यांनी, आभाळ पेललेले
संचीत ते तरीही, अजमावणे जरासे..

- प्राजु