तुझ्या प्रीतीचे देणे

राहून गेले जसे द्यायचे
तुझ्या प्रीतीचे देणे
आणिक उरले मला घातले
प्रेम फ़ुलांचे उखाणे..

कितिक हळव्या मूक क्षणांनी
मम झोळीचे भरणे
द्वैत -अद्वैताच्या झगड्यामध्ये
हृदयाचेही झुरणे..

वेचूनी सार्‍या प्रीत पाकळ्या
वहीत सारे जपणे
आठवणींच्या रानामध्ये
पुन्हा पुन्हा ते चुकणे..

जपूनी मोती नयनांमध्ये
मिटून पापण्या घेणे
क्षणैक हळव्या, कधीतरी ते
उगाच हुकुमी हसणे..

किती घालू मी समजूत त्याची
मन माझे हे दिवाणे
लोप पावल्या सूरांत अजूनी
शोधित राही तराणे..